Май айында Баткен шаарындагы аскер кызматкерлери үчүн салынып жаткан турак-жайлар пайдаланууга берилет. Батирлердин ачкычтары Куралдуу күчтөрдүн күнүнө карата тапшырылганы турат. Баткен облусуна болгон эки күндүк иш сапарынын жүрүшүндө өкмөт башчы Сооронбай Жээнбеков аскерлер үчүн курулуп жаткан бул турак-жайлардын курулушу менен таанышып, Лейлек райондук ветеринардык диагностика жана экспертиза борборуна барды. Ошол эле маалда премьер-министр дагы бир топ социалдык обьектилердин курулушу менен дагы жеринде таанышты.
Баткен шаарындагы аскер кызматкерлери үчүн салынып жаткан 3 кабаттуу үч турак-жайдын курулушу аяктап калды. Азыр үйлөрдүн ичиндеги курулуш жумуштары жүрүп жатат. 90 батирлүү турак-жай толук бүтүп, пайдаланууга берилсе Башкы штабдын, Улуттук гвардия, коргоо министрлиги жана мамлекеттик чек ара кызматынын аскер кызматкерлерине турак-жайлардын ачкычтары тапшырылат. Турак-жайлардын курулуш жумуштары менен таанышкан өкмөт башчы Сооронбай Жээнбеков мамлекет аскер кызматкерлерин ар тараптуу колдоого жана алардын аскердик демин жогорулатууга баардык шарттарды түзүүгө өзгөчө маани берээрин билдирди.
Google Play
App Store