Авиакырсыктан жабыркаган бир дагы адам мамлекеттин көңүл сыртында калууга тийиш эмес. Бул тууралуу президент Алмазбек Атамбаев биринчи вице-премьер-министр Мухамметкалый Абулгазиевди кабыл алганда айтты.
Мамлекет башчы каргашанын кесепети тийген бардык жарандарга жардам берүү боюнча иштиктүү чараларды көрүүнү улантуу зарылдыгын баса белгиледи. Жолугушууда мамлекет башчысына Дача- СУ конушунда трагедиянын кесепеттерин жоюу жана калыбына келтирүү иштери тууралуу маалымат берилди. Курман болгондордун үй-бүлөлөрүн жана жапа чеккендерди утурумдук турак-жай, зарыл медициналык жардам жана дары-дармек менен камсыздоо, балдарды социалдык коргоо, алардын окуусун уюштуруу жөнүндө сөз болду.
Мухамметкалый Абулгазиев андан тышкары, курман болгондордун үй-бүлөлөрүнө жана жапа чеккендерге укуктук жана материалдык жардам берүү, чыгымдарды өндүрүүгө колдоо көрсөтүү маселелеринин чечилиши тууралу президентке маалымат берди.
Google Play
App Store