Жалал-Абад облусунун Тогуз-Торо районунун Казарман айылында он алты адам тамак-аштан улам ууланды. Оорулардын алдын алуу жана санитардык көзөмөлдөө департаментинин маалыматына караганда, жабыркагандар кафелердин биринен түштөнгөндөн кийин, 13-майдын түнү уулануу белгилери менен ооруканага түшкөн.
Алардын бардыгы Тогуз-Торо районунун тургундары жана Казарманга спартакиадага келгендер болгон. Уулангандардын баары тиешелүү медициналык жардам алгандан кийин ооруканадан чыгарылган.
Текшерүү учурунда аталган кафеде санитардык жана азык-түлүк сактоо эрежелери бузулганы аныкталып, анын ишин токтотуу боюнча райондук санитардык дарыгердин токтому чыкты. Азыр тиешелүү органдар ууланууга эмне себеп болгонун иликтеп жатышат.
Google Play
App Store