Президенттик шайлоо учурунда коомдогу кырдаалды туруксуздаштыруу боюнча ар кандай аракеттерге катуу бөгөт коюлат. Бул тууралуу Президент Алмазбек Атамбаевдин төрагалыгы алдында өткөн Коопсуздук кеңешинин тар курамдагы жыйналышында айтылды. 

Мындан сырткары, Президенттикке талапкерлер үгүт өнөктүгүнүн алкагында массалык башаламандык уюштуруп, бийликти күч менен басып алуу аракеттерине шектелип Жогорку Кеңештин депутатынын кармалышына байланыштуу биринчи кезекте улуттук коопсуздукту камсыз кылуу маселесине басым жасоо менен президенттик шайлоого даярдык көрүү жана өткөрүү боюнча чаралардын комплекси тууралуу маалымат угулду.

Мамлекет башчысы Өкмөткө, президенттик шайлоодо жарандар туруктуу жана коопсуз шартта өз эрки менен эркин добуш берүүгө бардык шарттарды камсыз кылуу милдетин тапшырды. Белгилей кетсек, Кыргыз Республикасынын Коопсуздук кеңеши тууралуу мыйзамдын 5-беренесине ылайык, ыкчам чечим же кечиктирилгис мүнөздөгү башка чечимдерди кабыл алууну талап кылган улуттук коопсуздук маселелерин талкуулоо үчүн Коопсуздук кеңешинин Төрагасы тар курамдагы жыйынды же ыкчам кеңешме өткөрө алат.