АКШнын Флорида штатындагы орто мектепке 19 жаштагы жигит куралчан кол салып, анын кесепетинен 17 адам көз жумуп, бир нече адам жаракат алды. Бул тууралуу Би-би-си маалымдады.

Каза болгон адамдар тууралуу акыркы маалыматтарды жергиликтүү шерифтин кеңсеси таратты. «17 адам каза болгонун кайгыруу менен кабарлайм», - деп жазды шериф Скотт Израел социалдык түйүндөгү баракчасына. Кол салган жаран алгач өрт тууралуу белги берүүчү баскычты күйгүзүп, мектепте ызы-чуу башталган. Андан кийин ал чуркап бара жаткан адамдарга ок чыгарган.

Шерифтин айтымында, ок чыгарган адамда автоматтык мылтык болгон. Алгач ал көчөдө 3 адамды атып өлтүргөн. Андан кийин мектептин имаратына кирип, 12 адамга ок чыгарган. Мындан тышкары, эки адам ооруканада көз жумду. Каза болгондордун арасында окуучулар да бар. Азырынча ата-энелер жана мугалимдердин көз жумгандыгы тууралуу так маалымат жок. Окуянын кесепетинен жергиликтүү футбол командасынын машыктыруучусу көз жумганы белгилүү болду.

Американын жалпыга маалымдоо каражаттары ок чыгарган адам мектептин мурдагы окуучусу — 19 жаштагы Николас Круз экенин жазып чыгышты. Кийинчерээк шерифтин кеңсеси бул маалыматты тастыктап, 19 жаштагы жигит камакка алынганын билдирди.

Ооруканага жалпы 17 адам жеткирилип, алардын ичинен 2 каза тапты. Ал эми, дагы 3 жаран оор абалда жатат. Ошондой эле, ок чыгарган жигит да алгач ооруканага жеткирилип, медициналык жардам көрсөтүлдү. Андан кийин ал полиция кызматкерлерине өткөрүлүп берилди.