Кыргызстандык спортчу Муслим Евлоев Бишкек шаарында өтүп жаткан күрөш боюнча Азия чемпионатында алтын медаль утту. 

Маалым болгондой, ал эркин күрөш боюнча 74 кг чейинки салмактагылар арасында күч сынашып, 1/8 финалда тажикстандык Сорбон Абдулзаевди мөөнөтүнөн мурда 11:0 эсебинде жеңип алды. Ошондой эле, М.Евлоев чейрек финалда түркмөнстандык Довлетмурад Оразгылыжовду да мөөнөтүнөн мурда 12:2 эсебинде утту.

Ал эми, кыргызстандык балбан финалга чыгуу үчүн Ирандын өкүлү менен күч сынашып, беттеш 8:4 эсеби менен жыйынтыкталды. Ал финалда килем үстүндө монголиялык Мандахнаран Ганзориг менен беттешти. Биринчи мөөнөттө калыстар М.Евлоевге пассивдүүлүк үчүн эскертүү беришип, ал жооп катары 4 упай топтоого жетишкен. Бирок монголиялык машыктыруучулар буга макул болбой, кайра беттешүүнү талап кылып, 5:0 эсебинде утулуп калышты.

Андан кийин М.Евлоев каршылашынын артынан өтүп, дагы 2 упай топтоду. Балбандар 7:0 эсебинде тыныгууга чыгышты. Экинчи мөөнөттө кыргызстандык балбан ишенимдүү күрөшүүнү улантып, каршылашын мөөнөтүнөн мурда утуп, 11:1 эсебинде жеңишке жетти.

Аталган медаль Кыргызстан үчүн Азия чемпионатында онунчу байге болду. Буга чейин ушул эле чемпионатта герк-рим күрөшү боюнча Акжол Махмудов чемпион болгон болчу.