Ош облусунун аймагында «Йакын Инкар» диний экстремисттик агымынын 16 мүчөсү кармалды. Бул тууралуу Ош облустук ички иштер башкармалыгынын басма сөз кызматы билдирди. 1-март күнү Ош шаардык сотунун өкүмү менен 9 адам эркинен ажыратылып, жазасын күчөтүлгөн тартипте түзөтүү абагында өтөө үчүн сот залынан камакка алынды. 

Алар өлкө аймагында 2017-жылдын 15-июнунда Бишкек шаардык жана Октябрь райондук соту тарабынан ишмердүүлүгүнө тыюу салынган «Йакын Инкар» диний экстремисттик агымынын мүчөлөрү катары Кара-Суу районунда кармалган. Учурда 7 жаранга карата тергөө иштери жүргүзүлүүдө. Ошондой эле, 6 жаран Араван районунан, бир жаран Өзгөн районунан кармалышкан. 

Белгилей кетсек, "Йакын инкар" диний тобу Кыргызстанда дааватчылык уюму катары таанылган "Таблиги жамааттан” бөлүнүп чыккан деп эсептелет. Анын мүчөлөрү "балдар, кыздарды мектепте бөлүп окутуу зарыл, телефон, телевизорду колдонбош керек", - деген сыяктуу кескин эрежелерди карманат.