Бишкекте калк арасында ВИЧ илдетине тез текшерүүчү тест киргизилип, аныктоо иштери жүрүүдө. Буга 4 күн мурда шаардын ири базарларынан аныкталган окуя себеп болду.

300 адамдын ичинен 5 адам ВИЧ инфекциясына кабылганы аныкталган. Бул 2 пайызды түзүп жаткандыктан толук кандуу эпидемия тууралуу сөз кыла берсе болот, - дешет адистер. Оорулуулар жөнөкөй жарандардын арасынан табылганы эң кейиштүү. Ушул жылдын 1-май күнү алынган маалыматка караганда, Кыргызстанда ВИЧке кабылгандардын саны 9 миң 800 адам. Алардын 658и кичинекей балдар. Дарыгерлер ата-энелер жоопкерчиликтүү болуп, балдары төрөлө электе алдын-ала текшерилип туруу зарылдыгын айтышат.

"Бул ооруга кабылгандар жакшылап дарыланса айыгып кетет. Азыр бардык шарттар түзүлүүдө. Учурда эч кимдин көзөмөлүсүз өзүн-өзү текшерүүчү тесттер ишке кирүүдө. Канды текшерүүнүн да мөөнөтү азайып 1-2 жумада жыйынтыгы даяр болууда.
Баарыбыздын максатыбыз алдыдагы 11 жыл ичинде ВИЧтин деңгээлин нөл пайызга түшүрүү",- дейт Саламаттык сактоо министрлигинин коомдун саламаттыгы боюнча башкармалыгынын башкы адиси Шарипа Суваналиева.