Ош мамлекеттик университетинде өзбек тилине которулган "Манас" эпосу китебинин бет ачары болду. Иш- чара "Ош шаары - түрк дүйнөсүнүн маданий борбору" эл аралык саамалыгынын жабылыш аземинин алкагында өттү."Манас" эпосун өзбек тилине өзбекстандык акын-жазуучу Зухриддин Исомиддинов которду. "Манас эпосу" Бексултан Жакиев кыскартып иштеп чыккан вариант боюнча өзбек тилине которулган. Анын басылып чыгарылышын "ТҮРКСОЙ" эл аралык уюму каржылады.

"Менин котормомду, тагыраагы Бексултан Жакиевдин вариантын мен "Манас" эпосунун каймагы дээр элем. Ар бир сөздүн ордун алмаштырбаганга аракет кылдым. Бул , Оштогу өзбек тилдүү мектептерге абдан зарыл деп ойлойм. Ал эми Өзбекстандагы кыргыз тилдүү мектептерге кыргыз тилиндеги "Манас" китеби менен камсыздашыбыз керек",- деди “Манас” эпосун өзбек тилине которгон котормочу Зухриддин Исомиддинов. 
"Өзбек тилине которулган "Манас" эпосу китебинин бет ачаарын эл аралык долбоордун ачылыш аземине белгилөө жөн жерден эмес, келерки жылы да Өзбекстанда Манаска байланышкан иш-чаралар өтөт деп ойлойбуз",- деди Маданият, маалымат жана туризм министринин орун басары Кайрат Иманалиев.