Индонезиянын Тышкы иштер министрлиги искусство жана маданият тармагы боюнча билим алууну каалаган кыргызстандыктар үчүн стипендиялык программасын жарыялады. Бул туурасында Билим берүү жана илим министрлигинин маалымат кызматы билдирди. 

Ага ылайык, окутуу 2-майдан 15-августка чейин Индонезиянын Бали, Батыш Суматра, Чыгыш Калимантан, Батыш Ява, Түштүк Сулавеси жана Жокьякарта провинцияларында жайгашкан искусство жана маданият борборлорунда өтөт. Стипендианттар бир жума жашагандан кийин алардын кызыгуусуна жараша арт-борборлорго бөлүштүрүлөт. 

Борборлор Индонезия маданияты жана искусствосу менен тааныштырат. Ошондой эле, айрым курстар айырмаланат. Мисалы, Батыш Явада салттуу гүлдүү кездеме даярдоо жараянын жана Ява бийин үйрөнүшөт. 

Балиде болсо - Бали бийи жана гамелан улуттук оркестри боюнча билим алышат. Окутуу акысыз, эки тарапка авиабилет, жатакана, тамак-аш жана башка чыгымдар Индонезия бийлиги тарабынан төлөнөт. 

Мындан сырткары, ай сайын 2 млн рупий стипендия берилет. Катышуучулар керектүү документтерди 12-февралга чейин Кыргызстандын Тышкы иштер министрлигине тапшырышы зарыл.