Кумтөр кенинде экскаватору менен кошо "Көк булуң" көлүнө кулаган айдоочунун сөөгү жээкке чыгарылды. Бул тууралуу ӨКМден билдишти. Эскерте кетсек, окуя 15-февраль күнү саат 18.00дөр чамасында болгон. Маалыматтарда кырсыктаган 54 жаштагы киши "Кумтөр" компаниясынын кызматкери, Жети-Өгүз районундагы Барскоон айылынын жашоочусу экени айтылат. Ал экскаватор менен иштеп жатканда мөңгүдөн жылып кетип, көлгө кулаган.
Көлгө кулаган кызматкерди издөөгө Бишкектен суучулдар жана Ысык-Көл облустук башкармалыгынын куткаруучулары барган. "Музду жарып, экскаваторчыгарылды. Мерт болгон айдоочунун сөөгү ИИМ кызматкерлерине өткөрүп берилди" - деп айтылат ӨКМдин маалыматында. Бул "Кумтөр Голд компани" ишканасындагы акыркы мезгилдеги экинчи кырсык. Буга чейин да, 2019-жылдын 1-декабрында, Кумтөр кенинин Лысый аймагында жердин борпоң теги көчүп, натыйжада аталган участокто иштеп жаткан эки жумушчу дайынсыз жок болгон. Кийин издөө иштери натыйжасын берген эмес.
Google Play
App Store