Шаршембиде АКШ Сенатына Ооганстандагы америкалык жоокерлерди өлтүрүү үчүн сый акы төлөп берүүгө Орусиянын катышы бар экени аныкталса, санкция салууну шарттаган мыйзам долбоору жөнөтүлдү.

Санкция салына турган кишилердин тизмесине Орусия президенти Владимир Путин да киргизилген.

Мыйзам долбоорун таасирдүү сенатор-демократ Роберт Менендес демилгелеген. Мыйзам долбооруна ылайык, Ооганстандагы америкалык аскерлерге кол салууда Орусиянын тиешеси бар экени тастыкталса, Трамп Орусия президенти Путинге, коргоо министри Шойгуга жана бул ишке катышы бар башка аткаминерлерге санкция салышы керек. Документте чабуулдарга тиешеси бар кишилердин жана уюмдардын америкалык активдерин камакка коюу, алардын Кошмо Штаттарга кирүүсүнө тыюу салуу да каралган.

Мындан тышкары кошумча санкциялар Владимир Путинге жакын олигархтарга, орусиялык саясий ишмерлерге жана алардын үй-бүлө мүчөлөрүнө да салынышы мүмкүн.

Шаршембиде Өкүлдөр палатасынын спикери Нэнси Пелоси MSNBC телекомпаниясына маек куруп, Орусияга токтоосуз түрдө санкция салууга чакырган.