Маданият, маалымат, спорт жана жаштар саясаты министрлиги “27-март Бүткүл дүйнөлүк театр күнүн” Бишкек жана Ош шаарларында белгилейт. 

Бишкек шаарындагы салтанат 27-март күнү А. Малдыбаев атындагы Кыргыз Улуттук академиялык опера жана балет театрында башталат. Иш-чарага бардык аймактардан театр жана оюн-зоок мекемелеринин чыгармачылык жамааттары чакырылды. Ал эми, Ош шаарындагы салтанат 29-март күнү С. Ибраимов атындагы Ош Улуттук кыргыз драма театрында белгиленет. 

Буга чейин “Эл аралык театр күнүнө” арналган иш-чаралар Бишкекте гана өтүп келсе, эми мындан ары аймактарда кезек-кезеги менен өткөрүлөт. Иш-чара санитардык-эпидемиологиялык талаптарды эске алуу менен өтөт.

Театр күнүнө арналган иш-чаранын алкагында Бишкек жана Ош шаарларында “Эргүү” улуттук театр сыйлыгын ыйгаруу салтанаты өтөт. Аталган сыйлыкты 2014-жылдан бери Кыргыз Республикасынын Маданият, маалымат, спорт жана жаштар саясаты министрлиги, Кыргызстан театр ишмерлер союзу жана "Айтыш" коомдук фонду биргеликте тапшырып келет. Быйыл бул сыйлык сегизинчи ирет тапшырылат.