Быйыл К.Медетбеков атындагы Талас облустук драма театрынын курулушу бүткөрүлөт. Бул туурасында Талас облусуна бир күндүк жумуш сапары менен барган Премьердин театрдын курулушунан кабар алуу учурунда маалымдалды. 

Архитектура, курулуш жана турак-жай коммуналдык чарба мамлекеттик агенттигинин директору Турдубек Мамбетов маалымдагандай, курулуш-монтаждоо иштери 2008-жылдын июль айында башталган. Бөлүнгөн каражаттын жалпы суммасы 113 млн. сомду түзөт.

«Бүгүнкү күнгө карата иштин 75% бүткөрүлгөн, аны жыйынтыктоо үчүн болжол менен 65 млн сом керектелет», – деди Турдубек Мамбетов. 

Премьер-министр белгилегендей, өлкө Президенти тарабынан 2016-жыл Тарых жана маданият жылы катары жарыялануусу алкагында бардык маданий объектилер, анын катарында Талас шаарындагы К.Медетбеков атындагы Талас облустук драма театрынын курулушу жыйынтыкталышы тийиш. Премьер-министр Сооронбай Жээнбеков андан соң Бакай-Ата районунун Миң-Булак айылындагы мектептин курулушунун жүрүшү менен таанышты. 

375 орунга ылайыкталган мектептин курулуш иштери 2018-жылы аяктайт. Быйылкы жылы Талас облусунда төрт социалдык объектини пайдаланууга тапшыруу пландаштырылууда.