20-апрелден 23-апрелге чейин Ош шаарында ордо боюнча Кыргыз Республикасынын чемпионаты өттү. Бул тууралуу Жаштар иштери, дене тарбия жана спорт агенттиги билдирди.
Маалыматка ылайык, мелдешке Ош , Жалал-Абад, Ысык-Көл, Нарын, Чүй, Талас облустарынын жана Бишкек, Ош шаарларынын курама командалары катышты.
Мелдештин жыйынтыгы боюнча биринчи орунду Талас облусунун ордочулары ээледи. Финалдык беттеште алар чемпионатта күмүш медаль тагынган Ош шаарынын курама командасын 109:85 эсебинде жеңди. 3-орунга болгон оюнда Бишкек шаарынын ордочулары Ысык-Көл командасын 125:39 эсебинде утуп алды. Жеңүүчүлөр диплом, медаль жана баалуу белектер менен сыйланышты.
Чемпионат Спорттун улуттук түрлөрү боюнча дирекциясы тарабынан Ош шаарынын дене тарбия жана спорт комитетинин көмөгү менен өткөрүлдү.
Google Play
App Store