Таласта суу ташкыны 46 турак жайды каптады. Арасында социалдык объектилер да бар. Өзгөчө кырдаалдар министрлиги билдиргендей, 25-май күнү кечки саат алты отуздар чамасында Бакай-Ата районунда кыска мөөнөттө жааган жаандын кесепетинен Маматай, Көк-Теке коктуларынан келген суу "Калинин" каналынан ашып, Түйтө айылындагы үйлөрдү, Бердике айылындагы айдоо жерлерди каптаган. 

Табигат кырсыгынан Талас районунда да айдоо аянттары, жолдор жарактан чыккан. 26-майда адистер жеринде тактоо жүргүзүп, материалдык чыгымды 3 млн 277 миң сом деп эсептеди. Тиешелүү адистер, техника менен тазалап калыбына келтирүү иштерин жүргүзүштү.