3-июнда Бишкекте өлкөнүн 2021-2025-жылдарга карата маалыматтык саясатынын концепциясынын долбоору тааныштырылат. Бул тууралуу Маданият, маалымат, спорт жана жаштар саясаты министрлигинин Маалымат жана коммуникациялар департаменти кабарлады.
Маалыматка караганда, иш-чара «КРдин маалыматтык саясатынын концепциясы. Мамлекет менен медианын диалогу» аттуу улуттук медиафорумдун алкагында өтөт. Анын жүрүшүндө сунушталган долбоордун негизги жоболору талкууланып, сөз эркиндигин коргоо, өзгөчө кырдаалар жана жаңжалдар учурундагы медианын иши тууралуу сөз болот. Мындан тышкары улуттук контентти өнүктүрүү үчүн маалыматтын жеткиликтүүлүгү менен ыңгайлуу шарттарды камсыз кылуу маселеси да көтөрүлөт.
Департаменттин маалыматына караганда, улуттук медиафорумга эксперттер, медиатармактын, мамлекеттик органдардын, эл аралык жана коомдук уюмдардын өкүлдөрү катышат.
Google Play
App Store