Тажикстандын Айни районундагы "Кумарги Боло" алтын кенин иштетип жаткан ТВЕА кытай компаниясынын 200гө жакын тажикстандык жумушчусу ишканадагы тамак-аштын сапатына нааразылык катары иш таштады.

Маалыматка караганда, 25-июнда жергиликтүү жумушчуларга кезектеги жолу күрүч жана арпа акшагы берилген. Алар мындай тамакты ичүүдөн баш тартып, нааразылык катары аны жерге төгүп салышкан.

Аты-жөнүн билдиргиси келбеген жумушчулардын айтымында, жетекчилер алардын алдына чыгып, маселени чечүүнү убадалашкан.

«Бизге кайнатылып бышырылган, эти жок тамак берип жатышат. Кен бийик тоолуу жерде жайгашкандыктан, жумушчулар колориялуу азыктар менен тамактанышы керек. Биздин нааразылыгыбыздан кийин жетекчилик маселени чечүүнү убадалаган, бирок убадасы аткарылган жок. Биз түшкү тамаксыз калдык, 17:00дө гана картөшкө кууруп беришти», — деди жумушчулардын бири.

ТВЕА компаниясынын жетекчилиги менен Айни районунун бийлик өкүлдөрү бул боюнча комментарий берүүдөн баш тартышты.

ТВЕА кытай компаниясы 2018-жылы Айни районундагы "Жогорку Кумарг" жана "Чыгыш Дуоба" алтын кендерин иштетүүгө лицензия алган. Мындай укук компанияга “Душанбе-2” жылуулук электр борборунун (ЖЭБ) курулушуна короткон каражатын кайтарып алуу үчүн берилген. “Душанбе-2” ЖЭБ долбоорунун жалпы баасы 340 миллион долларды түзгөн. Анын 331 миллион долларын Кытайдын Эксимбанкы жеңилдетилген насыя катары берсе, 17,4 миллионун Тажикстандын “Барки Точик” энергохолдинги бөлгөн.

Тажикстанда буга чейин да жергиликтүү жумушчулар укуктары бузулуп жатканын айтып, кытайлык компанияларга нааразылыктарын айтып келишкен. Быйыл апрелде жумушчулардын укуктарын бузганы үчүн акцияларына China Nonferrous Gold Limited (CNG) кытай компаниясы ээлик кылган «Покруд» биргелешкен ишканасына 1500 сомони (133 доллар) өлчөмүндө айып пул салынган.

Тажикстандын Калктын социалдык жактан корголушун көзөмөлдөө боюнча мамлекеттик кызматы компанияны текшерүү учурунда аныкталган мыйзам бузууларды бир айдын ичинде жоюуга милдеттендирген. Мекеменин билдирүүсүндө кытайлык жумуш берүүчүлөр Саламаттык сактоо министрлигинин сунушуна карабастан, ишканадагы вахталык жумушчулар үчүн үч жумалык карантин киргизгени жазылган. Бул аралыкта жумушчулардын ишкана аймагынан чыгуусуна тыюу салынган.

Жыл башында Душанбенин борборунда Тажикстан өкмөтүнүн жаңы имаратын куруп жаткан "Чиангду" кытай компаниясынын жумушчулары «начар эмгек шарттарына» жана укуктарынын бузулуп жатканына даттанышкан.