Ишемби күнү республика боюнча массалык ишембилик өтөт.  Бул иш чара бир эле учурда дүйнөнүн 150 өлкөсүндө да өткөрүлөт. Ыктыярчылар коомдук жайлардагы, сейил бактардагы таштандыларды жыйноого чыгат. Акцияга  тазалыкка салымын кошууну каалаган бардык жарандар катыша алышат.

Иш чараны уюштуруучулары бул өнөктүккө өз аймагынын тазалыгын камсыз кылууну каалаган жарандар кошулса болоорун айтат. Дүйнөлүк тазалык күнүнүн негизги максаты коомчулукту өлкөдөгү, дүйнөдөгү экологиялык абалга көңүл бурууга чакыруу.
 
Жыл сайын бул күнү 180 өлкөдө ишембилик өткөрүлүп келет. Себеби дүйнө жүзү боюнча учурда глобалдык көйгөйлөрдүн бири - экологиянын бузулушу. Таштандыларды тазалап, экологияны сактоо максатын көздөгөн бул акцияга Кыргызстан быйыл төртүнчү ирет катышканы турат.
 
Экологдор таштанды, айрыкча желим бөтөлкө, баштыктардын айлана-чөйрөгө олуттуу зыяны тууралуу айтып, коңгуроо кагууда. Бирок ага карабастан Кыргызстандын бермети аталган Ысык-Көлдүн айланасы эле эмес, суу асты тонналаган таштандыларга, балык кармоочу торлорго толуп калган.
 
Мындай “Тазалык” акциясы бир күн менен чектелбейт. Иш-чара жыл аягына чейин өткөрүлмөкчү.