Чек ара кызматынын маалымат жана коммуникация башкармалыгынын акыркы маалыматына ылайык, саат 16.00гө карата Баткен облусунун Баткен районундагы кыргыз-тажик мамлекеттик чек ара тилкесинде кырдаал чыңалуу бойдон сакталып турат.
“Самаркандек” чек ара заставасынын аймагындагы Паскы-Арык жеринде ок атышуу токтоду.
Эртең менен саат 08:10дөн баштап, Баткен облусунун аймагында тажик тараптын провокациялары менен коштолуп, улам ок атышуулар маал-маалы менен орун алууда.
Саат 08:10дө Булак-Башы аймагында куралдуу кагылышуу болуп, саат 14:00дө тажик тарап Как-Сай жеринде, ал эми саат 15:08де Паскы-Арык жеринде тажик тараптан ок атуулар башталган.
Кыргызстан менен Тажикстандын чек ара өкүлдөрү ок атышууну токтотуу боюнча сүйлөшүүлөрдү жүргүзүүдө. Эки өлкөнүн чек ара өкүлдөрүнүн сүйлөшүүлөрү эми Паскы-Арык жеринде уланары күтүлүүдө.
Чек ара өкүлдөрү чыр-чатак орун алган жерлерди кыдырып, атышуулардын чоо-жайын такташууда.
Google Play
App Store