Жогорку Кеӊештин Тармактык комитетинде Олимпиаданын жана бир катар оюндардын алтын медалына ээ болгон спортчуларга 10 миллион сомдон, ал эми машыктыруучуга спортчунун 30% сыйакысын төлөп берүүнү караган мыйзам долбоору каралды.

Жогорку Кеңештин депутаттары “Дене тарбия жана спорт жөнүндө” мыйзамга өзгөртүү киргизүүнү сунуштап, мыйзам долбоору 16-январда Социалдык саясат комитетинде каралып, биринчи окууда кабыл алынды.

Демилгечилер белгилегендей, дене тарбия жана спорт тармагындагы алдыңкы спортчуларды, кесипкөй машыктыруучуларды, башка адистерди мамлекеттик социалдык колдоону ишке ашыруу максатында, ошондой эле алардын жогорку жетишкендиктерин жана эл аралык спорт коомчулугунда өлкөнүн кадыр-баркын чыңдоого кошкон салымын стимулдаштыруу менен бирге, бир жолку акчалай сыйлыктар түрүндөгү социалдык кепилдиктерди мыйзамдуу түрдө бекитүү сунуш кылынды.

Ошентип, Олимпиада жана Паралимпиадалык оюндардын, Азия жана Пара Азия оюндарынын чемпиону же байгелүү орунга ээ болгон спортчуларга бир жолку акчалай сыйлыктарды берилиши каралууда:

- Алтын медаль – 10 000 000 сом

- Күмүш медаль – 7 000 000 сом

- Коло байге – 5 000 000 сом

- жаштар арасында Олимпиада жана Паралимпиадалык оюндардын, Азия жана Пара Азия оюндарынын чемпиондук наамдарын жеңип алган же байгелүү орунга ээ болгон спортчуларга:

- 1-орун – 1 000 000 сом

- 2-орун – 500 000 сом

- 3-орун – 250 000 сом

Мыйзам долбоорунда стимул катары машыктыруучулар курамына жана башка тиешелүү адистерге бир жолку акчалай сыйлыктар ыйгарылат. Алсак, башкы машыктыруучуга спортчунун акчалай сыйлыгынын суммасынан 30%, улук жана жеке машыктыруучуларга 25%, биринчи машыктыруучуга жана медицина кызматкерлерине 10% өлчөмүндө бир жолку акчалай сыйлык берилет.

Мыйзам долбоорунун демилгечилери – депутаттар Коргонбай уулу Жусупбек, Сыдыгалиев Нурбек Өмүрбекович, Примов Улан Бердибаевич, Атазов Шайлообек Карыбекович, Төлөнов Данияр Эрмекович, Масабиров Таалайбек Айтмаматович, Икрамов Тазабек Икрамович болушту.

 Кыргыз Республикасынын атынан эл аралык аренада көз карандысыздыкты алгандан тарта спортчулар Олимпиадада 7 медаль жеңип алышты (3 күмүш жана 4 коло).