Талас районуна өзгөчө кырдаал режими киргизилди. Өзгөчө кырдаалдар министрлиги билдиргендей, райондун Р.Айдаралиев айыл аймагына караштуу Көпүрө-Базар айылынан агып өткөн Кара-Кол дарыясына муз тоңуп, жээкке жакын жайгашкан үйлөрдү, короо-жайларды каптоо коркунучу жаралган. 

Мындан улам 26-январда Талас райондук Жарандык коргонуу комиссиясынын төрагасы-аким, ӨКМдин Талас облустук башкармалыгынын жетекчилик курамы Сел жана суу ташкындарынан коргоо бөлүмүнүн башчысы менен биргеликте Көпүрө-Базар айылында жеринде изилдөө иштерин жүргүзүп, облустук жарандык кызматтарды тартуу чечимин кабыл алышты. Кырдаалды жөнгө салуу максатында райондун аймагында өзгөчө кырдаал тартиби жарыяланды. Учурда №36 жол тазалоо ишканасынан 10 жумушчу, 2 техника тартылган. “Кызыл ай” коомунун Талас облусундагы өкүлчүлүгү колдоо көрсөтүүгө даяр экендигин билдирип, муз тазалап иштеп жаткандарга 3 күндүк ысык тамагын уюштурууда.