Быйыл жаз эрте келгенине байланыштуу Чүй жергесиндеги баба дыйкандар айдап себүү иштерин аяктайын деп калды. Облустагы жалпы айдоо аянттын 60 пайызга жакынына арпа, буудай эгилди. Мындан тышкары жер иштетүүчүлөр мамлекет тарабынан колдоого алынып арзан күйүүчү май жана үрөн менен камсыз болгон.

Маевка айылында жазгы талаа жумуштары дээрлик 100 пайыз аяктады. Бул айыл өкмөттө бир жарым миң гектардай айдоо аянты болсо анын 120 гектарына турак-жай курулуп амнистияга кирген. Жергиликтүү бийлик учурда сугат мезгилине арыктарды тазалап жатат.

Чүй облусунда жалпы 420 миң гектардай жер иштетилет, анын 265 миң гектарынан ашыгы сугат калганы кайрак жер. Быйыл дагы дыйкандарга 300 миң тоннадай Россиядан келген элита сортундагы арзандатылган эгин үрөнү таратылган. Мындан тышкары облуска 950 миң тонна дизель майы нарк 65 сомдон камсыздалган. Бул жылы фермерлер эгин менен кант кызылчасына басым жасоодо.

Президенттин Чүй облусундагы ыйгарым укуктуу өкүлүнүн кеңешчиси Сыргак Кыдыкеев: “Соңку жылдары мамлекет тамак-аш коопсуздугун камсыздоого багытталган бир катар иштерди күчөттү. Айыл чарбасын каржылоо долбоорунун алкагында жеңилдетилген насыя берилип келет, андан тышкары коңшу өлкөлөрдөн сапаттуу үрөндөр алынып келүүдө. Дыйкандарга чоң көйгөй жаратып келген сугат сууну үзгүлтүккө учуратпоо максатында өткөн жылы ирригация тутумун оңдоого 1 млрд сом бөлүнгөн.”