2023-жылдын 12-апрелинде Гамбург шаарынын Соода палатасынын Чыгыш Европа жана Борбордук Азия боюнча комитетинин отуруму болуп өттү. Ага Кыргызстандын Соода-өнөр жай палатасынын президенти Темир Сариев ардактуу конок катары катышты.Өзүнүн сөзүндө Кыргыз Республикасынын Соода-өнөр жай палатасынын президенти Т.Сариев Кыргыз Республикасынын инвестиция жана кыргыз продукциясын экспорттоо жаатындагы мүмкүнчүлүктөрүнө токтолду. Энергетика, тоо-кен өндүрүшү, туризм жана логистикалык долбоорлор кызматташтыктын артыкчылыктуу багыттары катары белгиленди.Кыргыз Республикасынын Германиядагы Элчиси Өмүрбек Текебаев өз сөзүндө Кыргызстанда бизнес жүргүзүүнүн артыкчылыктарына жана кыргыз-герман экономикалык кызматташтыгынын кеңейтүү зарылдыгына токтолду.

Герман бизнесинин өкүлдөрү логистика, минералдык ресурстар, кайра жаралуучу энергия булактары жана органикалык азык-түлүктөрдү Кыргызстандан жеткирүү жаатында кызматташууга кызыкдар экенин билдиришти.

Ошондой эле, быйыл кыргыз-гамбург бизнес форумун өткөрүү боюнча макулдашылды.