Коррупцияга шек саналып кармалган Токмок шаарынын мэри Урматбек Самаевдин бөгөт чарасы өзгөртүлүп, ал үй камагына чыкты.
Бишкек шаардык сотунун басма сөз кызматы билдиргендей, мындай чечим 29-апрелде Октябрь райондук сотунда кабыл алынды. Маалыматта айтылгандай, Самаевди үй камагына чыгаруу өтүнүчү менен сотко прокуратура кайрылган.
14-апрелде Улуттук коопсуздук боюнча мамлекеттик комитет "Токмок жылуулук" муниципалдык ишканасындагы коррупциянын айынан 130 миллион сомдук зыян аныкталганын билдирген жана көп өтпөй Самаев кармалган.
18-апрелде УКМК билдирүү таратып, Самаев "Токмок жылуулуктагы" туруктуу коррупциялык схема уюштурууга тиешеси бар экени аныкталганын, Кылмыш-жаза кодексинин “Кызмат абалынан кыянаттык менен пайдалануу” беренесинин негизинде иш козголуп, ал убактылуу кармоочу жайга киргизилгенин кабарлаган.
Урматбек Самаев Токмок шаарынын мэри кызматын 2021-жылдан бери аркалап келет.
Google Play
App Store