Улуттук госпиталдын “Ден соолук кербени” Чүй облусунун айылдарынын тургундарын профилактикалык кароодон өткөрүүдө. 

Саламаттык сактоо министрлигинен билдиришкендей, июнь айынын башынан бери 6 миңден ашуун адам текшерүүдөн өткөрүлдү. Ал эми 2023-жылдын март айынан май айына чейин аталган кербен Ысык-Көл облусунун 11 айыл округунун тургундарын камтып, анда 16 миң 826 адам текшерилип, анын ичинен 2 миң 437 адам лабораториялык жана диагностикалык жабдуулардын жардамы менен деталдуу текшерүүдөн өттү. 2022-жылдын май айынан ноябрга чейин "Ден соолук кербени" Нарын жана Ысык-Көл облустарынын жети районундагы 129 миң 770 жашоочусу бар 24 айыл округун кыдырып, 41 миң 815 тургунду медициналык кароодон өткөрүп, анын ичинен 4 миң 621и лабораториялык жана диагностикалык жабдууларды колдонуу менен деталдуу текшерүүдөн өткөн. Улуттук госпиталдын "Ден соолук кербени" автопоездинин базасындагы көчмө консультациялык-диагностикалык кызматынын бөлүмү айылдардын жана жетүүгө кыйын аймактардын калкынын ооруларын алдын алуу жана диагностикалоону жакшыртуу максатында айыл тургундарын жана алыскы аймактардын жашоочуларын профилактикалык кароодон өткөрөт. “Ден соолук кербени” Нарын, Ысык-Көл жана Чүй облустарында жүрөт.