Жашыруун улутчул топтун мүчөлөрү кармалганын атайын кызмат кабарлады.
Маалыматта айтылгандай, Бишкек шаарында жана Чүй облусунда улутчулдардын жашыруун тобу иш жүргүзүп, азиат улутундагы адамдарга карата мыйзамсыз иш-аракеттерди жасап, видеого тартып, социалдык тармактарга жарыялап жаткандыгы тууралуу маалыматтар алынган. Улутчул топтун мүчөлөрү өздөрүнүн видеолорунда фашисттик символдорду колдонушкан.
УКМК тарабынан ыкчам иликтөө иш-чараларын жүргүзүп, анын натыйжасында аталган топтун үч мүчөсү Кыргызстандын жарандары, Бишкек шаарынын жана Чүй облусунун тургундары экенин аныктап, үчөө тең кармалды. Тергөө иш-чараларынын алкагында кармалгандардан алардын мыйзамсыз иш-аракеттерин далилдеген буюмдар алынган.
Кармалгандар УКМКнын убактылуу кармоочу жайына киргизилди. Учурда жашыруун улутчул топтун башка мүчөлөрүн аныктоо жана кармоо боюнча ыкчам-иликтөө иш-чаралары жүргүзүлүүдө.
Google Play
App Store