“Кербен” аба майданындагы оңдоо иштерин аяктоо алдында турат."Манас" эл аралык аэропортунун басма сөз кызматынан билдиришкендей, ишкананын төрагасы Манасбек Самидинов аэропорттун курулуш иштеринин жүрүшү менен таанышты. 

Учурда аэропорттун учуп-конуу тилкеси, асфальт-бетонтөшөлмөсүндө оңдоо-калыбына келтирүү иштери толук кандуу жүрүүдө."Иштердин бардыгын үстүбүздөгү жылдын 5-августуна чейин бүтүрүүнү көздөп жатабыз. Аэропортуда оңдоп-түзөө иштери бүткөндөн кийин Мамлекеттик жарандык авиация агенттиги тарабынан текшерүүдөн өтүп, жарактуулук тастыктамасы берилет. Аталган агенттик уруксат бергенден кийин аэропорт толук кандуу ишке киргизилет", -деп билдирди Манасбек Самидинов. Белгиленгендей, аэропорт жергиликтүү каттамдарга ылайыкталган, оңдоп-түзөө иштери аяктаган соң Бишкек - Кербен -Бишкек багыты боюнча каттамдар 4 мезгил бою, ал эми Кербен - Ысык-Көл - Кербен багыты боюнча каттамдар жайкы туристтик мезгилде аткарыла баштайт. Эске салсак,"Караван" аэропортунун пайдубалы 1976-жылы, түптөлүп 1980-жылы биринчи учак конгон. Ал эми Кыргызстан эгемендүүлүктү алгандан бери 2007-жылы"Кербен" аэропортунан акыркы учак учуп, ошол маалдан бери аэропорт иштебей келет.