Кыргыз Республикасынын Министрлер Кабинетинин Төрагасы – Кыргыз Республикасынын Президентинин Администрациясынын Жетекчиси Акылбек Жапаров Япониянын Финансы министринин орун басары Масато Канда менен жолукту. Жолугушуунун жүрүшүндө тараптар кыргыз-япон өз ара аракеттенүү маселелерин талкуулашты жана өз ара кызыкчылык туудурган бардык чөйрөлөрдө кызматташууну мындан ары кеңейтүү үчүн жогорку потенциалды белгилешти.

МинКаб Башчысы учурда өлкөнүн социалдык-экономикалык өнүгүүсүн тездетүү боюнча бардык зарыл чаралар көрүлүп жатканын, ошондой эле жогорку технологияны өнүктүрүү тапшырмасы коюлганын, атаандаштыкка жөндөмдүү экспорттук тармакты өнүктүрүү, мамлекеттин экономикасын камсыз кылууда өнүктүрүүнүн экспорттук-сырьелук түрүнөн индустриалдык-инновациялык түрүнө өтүү милдети коюлганын белгиледи.

Япония автомобиль чыгаруу, кеме куруу, курулуш жана металлургия, энергетика, робототехника жана тамак-аш өнөр жайы сыяктуу тармактарда лидер экенин эске алып, МинКаб Башчысы бул багытта кызматташууга кызыкдар экенин билдирди.

Мындан тышкары, ал Кыргыз Республикасынан кадрларды даярдоону жакшыртуу боюнча чараларды кароону сунуштады, анын ичинде тилди окутуу жана япон эмгек рыногунун муктаждыктарына жооп берген кесип ээлерин үйрөтүү.

Акылбек Жапаров 12 жыл мурда JICA тарабынан Кыргыз Республикасында ишке ашырыла баштаган жана эң жакшы натыйжаларды көрсөткөн “Бир айыл - бир продукт” долбоорунун ийгилигине токтолуу менен бирге 2023-жылы долбоор Улуттук долбоор статусун алганын кошумчалады.

Өз кезегинде Япониянын финансы министринин орун басары Масато Канда эки тарапты кызыктырган бардык долбоорлорду, анын ичинде жолугушуунун жүрүшүндө айтылган долбоорлорду колдоого даяр экенин билдирди.

Мындан тышкары, ал МинКаб Башчысына өлкөнүн каржы саясатын изилдөө жана анын жыйынтыгы боюнча бир катар экономикалык жана финансылык маселелер боюнча сунуштарды киргизүү, анын ичинде мамлекеттик карызды башкаруу, бюджеттин чыгашаларын жана салыкты жакшыртуу боюнча жакын арада Кыргыз Республикасына адистердин тобу жөнөтүлөөрүн маалымдады.

Масато Канда ошондой эле япон тарап гранттарды жана жеңилдетилген насыяларды тартуу жана берүү жагынан эл аралык каржы институттары (Азия өнүктүрүү банкы, Европа реконструкциялоо жана өнүктүрүү банкы) аркылуу колдоо көрсөтүүгө даяр экенин кошумчалады.