Жалал-Абадда опузалап пара алууга шектелген прокурордун жардамчысы кармалды. Бул тууралуу Ички иштер министрлигинен билдиришти.

Маалыматка ылайык, ушул жылы сентябрда Ички иштер министрлигине жана Башкы прокуратурага Жалал-Абад облусунун тургуну укук коргоо органынын кызматкеринин мыйзамсыз аракеттерине байланыштуу чара көрүү өтүнүчү менен кайрылган.

Арызда прокуратура кызматкери кылмыш жоопкерчилигине тартам деп коркутуп, көптөн бери опузалап, акча каражатын алып жүргөнү айтылат. Аталган факты Аскердик прокуратурасында каттоого алынып, андан ары иликтөө үчүн материалдар Жалал-Абад гарнизонунун Аскердик прокуратурасына өткөрүлүп берилди.

Топтолгон материалдардын негизинде КР Кылмыш-жаза кодексинин "Опузалап пара алуу" беренеси боюнча кылмыш иши козголгон.

Козголгон кылмыш ишинин алкагында ыкчам иш-аракеттерди ИИМдин Кылмыш иликтөө башкы башкармалыгынын 4-башкармалыгынын кызматкерлери жүргүзгөн.

Үстүбүздөгү жылдын октябрь айынын башында прокуратуранын кызматкери башка районго которулганы аныкталган. Ага карабастан айдын аягында кайра чалып, 20 миң сом акча каражатын талап кылган.

Андан аркы аракеттер укук коргоо органдарынын көзөмөлүндө жүргүзүлдү. Прокуратура кызматкеринин кезектеги опузалап талап кылуусунан кийин, ишкер 20 миң сом өлчөмүндөгү акчаны төлөм терминалы аркылуу электрондук капчыкка которгон.

Ошол эле күнү ИИМдин Кылмыш иликтөө башкы башкармалыгынын 4-башкармалыгынын кызматкерлери жана Жалал-Абад гарнизонунун Аскер прокуратурасынын кызматкерлери тарабынан тергөө-ыкчам иш-чаралардын жүргүзүлүп, Тогуз-Торо районунун прокурорунун жардамчысын жумуш ордунда кармалган. Буга чейин ал Жалал-Абад облусунун Аксы районунун прокурорунун жардамчысы болуп иштеп, бир нече жума мурда жаңы жумуш ордуна которулган.

Тергөөнүн жүрүшүндө жогорудагы белгилер коюлган акча каражаттары далил катары төлөм терминалынан алынган.

Азыркы учурда сот тарабынан аны гауптвахтада кармоо боюнча бөгөт чарасы тандалды.