"ЦУМ-Айчүрөк" соода борборунун ээси Анвар Габбазовго эл аралык издөө жарыяланды. Бул тууралуу Улуттук коопсуздук мамлекеттик комитетинен билдиришти. 

УКМК Камчв Асанбектин уюшкан кылмыштуу тобунун мүчөлөрүнө жана уюшкан кылмыштуу топторду каржылаган айрым жеке ишкерлерге карата кылмыштуу кирешелерди легалдаштыруу фактылары боюнча тергелип жаткан кылмыш ишинин алкагында Габбазов Анвар Илшатовичке карата "Уюшкан топторду жана кылмыштуу коомдоштуктарды каржылоо" боюнча каралган кылмышты жасагандыгы үчүн сыртынан айып тагылды. Ал Камчы Асанбектин уюшкан кылмыштуу тобунун мүчөлөрүн каржылоо, ошондой эле кылмыштуу кирешелерди легалдаштыруу менен алектенген. Тергөөнүн жүрүшүндө Габбазов өзүнүн жардамчысы Рамонов аркылуу Камчы Асанбекке “Мерседес Бенц 222” брондолгон автоунаасын белекке берген, унаа Габбазовдун жеке каражатына сатылып алынган. 2020-жылдын октябрь айында алар аталган унааны экс-премьер-министр Сапар Исаков абактан чыккандан кийин өткөрүп беришкен. Ошол эле учурда козголгон кылмыш ишинин алкагында А.Габбазов жана К.Асанбек аффилиацияланган жактар менен биргеликте Ысык-Көл облусундагы Кара-Ой айылында жайгашкан, баасы 15 млн АКШ доллары болгон мурдагы "ЗИЛ" пансионатынын 42 гектар жерин мыйзамсыз ээлеп, өз адамдарына каттатып алышкандыгы тууралуу маалымат түшкөн. Мындан тышкары, А.Габбазов менен К.Асанбектин ортосундагы жалпы финансылык иштер жана кызматташуу фактылары аныкталган. Тактап айтканда, А.Габбазов Бишкектин престиждүү аймактарынын биринде жайгашкан, мурда К.Асанбектин жакын тууганынын наамына катталган кымбат батирди, ошондой эле Ысык-Көл облусундагы Чолпон-Ата шаарында жайгашкан "Каганат" эс алуу борборунан коттедж сатып алган. Учурда А.Габбазовго эл аралык издөө жарыяланып, тергөө жана ыкчам иш-чаралары жүргүзүлүүдө.