Бишкек шаарында Кыргызстандын Тышкы иштер министрлиги менен Швейцариянын Тышкы иштер федералдык департаментинин ортосунда кезектеги саясий консультациялар өткөрүлдү.

ТИМден билдиришкендей, кыргыз делегациясын тышкы иштер министринин орун басары Айбек Молдогазиев, швейцариялык делегацияны мамлекеттик катчынын орун басары, Тышкы иштер федералдык департаментинин Евразия департаментинин башчысы Мюриэль Пеневейре жетектеди.

Консультациялардын жүрүшүндө тараптар эки тараптуу мамилелердин кеңири спектрин, эл аралык уюмдардын алкагында өз ара аракеттенүүнү талкуулашты жана эл аралык күн тартиби боюнча пикир алмашышты.

Тараптар ошондой эле эки тараптуу мамилелердин учурдагы абалын талдап, пландаштырылган иш-чараларга «пландарды» талкуулашты. Соода-экономикалык, инвестициялык жана суу-экологиялык чөйрөлөрдөгү өз ара аракеттенүү маселелерине өзгөчө көңүл бурулду. Тараптар эл аралык уюмдардын, анын ичинде БУУнун жана ЕККУнун институттарынын алкагында активдүү кызматташууну улантууга даяр экендиктерин билдиришти.

Бар болгон потенциалды эске алуу менен тараптардын инвестиция тартуу, саясий диалогду бекемдөө, B2B байланыштарын түзүү жана келишимдик-укуктук базаны кеңейтүү аркылуу кыргыз-швейцариялык өз ара аракеттенүүнү өнүктүрүү боюнча биргелешкен күч-аракеттерге даярдыгы ырасталды.

Делегациялардын башчылары Кыргызстан менен Швейцариянын 2022-2025-жылдарга өлкө калкынын турмушунун социалдык маанилүү тармактарына багытталган Кызматташтык программасынын ийгиликтүү ишке ашырылып жаткандыгын канааттануу менен белгилешти.

Кыргыз Республикасы менен Швейцария Конфедерациясынын ортосунда өткөрүлгөн консультацияларда тараптардын эки тараптуу мамилелерди чыңдоого болгон өз ара каалоолору белгиленип, эки тараптуу жана аймактык максаттарга жетүү үчүн келечектүү багыттар аныкталды.