Түп районунун Арал айылында мамлекеттик мүлктү жеке менчикке мыйзамсыз өткөрүп берүү фактысы аныкталды. Бул тууралуу Улуттук коопсуздук мамлекеттик комитетинен билдиришти.

Мыйзамсыз жеке менчикке өткөн социалдык объектилерди кайтарып алуу боюнча мамлекеттик саясатты ишке ашыруунун алкагында УКМК тарабынан Ысык-Көл облусунун Түп районундагы Арал айылында мамлекеттик мүлктү жеке менчикке мыйзамсыз өткөрүп берүү фактысы аныкталды.

Тактап айканда, "Кадастр" мамлекеттик ишканасынын Түп райондук филиалынын мурдагы жетекчиси И.Б.А. Арал айыл аймагынын кызмат адамдары менен ич ара сүйлөшүп алып, жалган документтерди даярдап, анын негизинде Арал айыл аймагынын айыл өкмөт башчысынын жакын тууганы М.Б.О. айылдык китепкананын 0,16 гектар жер тилкесин мыйзамсыз жеке менчикке алган.

Тергөөнүн жүрүшүндө баасы 2,2 млн сомду түзгөн аталган жер тилкеси муниципалдык менчикке кайтарылды, ал эми "Кадастр" мамлекеттик мекемесинин жана Арал айыл аймагынын кызмат адамдарынын иш-аракеттерине тийиштүү укуктук баа берилет.

Учурда тергөө иштери жүрүп жатат.