Кыргызстандын математика боюнча курама командасы 65-Эл аралык математикалык олимпиадада (International Mathematical Olympiad 2024 (IMO) биринчи жолу командалык эсепте 122 упай топтоп, 108 мамлекеттин ичинен 29-орунду ээледи. Бул тууралуу Билим берүү жана илим министрлиги билдирди.

Маалыматка ылайык, аталган олимпиадада Кыргызстандык окуучулар 1 – алтын медаль, 3 – күмүш медаль жана 2 ардак грамотага ээ болушту.

Алтын медаль ээси:

Назар Киргизбаев (29 упай), Б.Якир атындагы автордук физика-математикалык №61 мектеп-лицейинин окуучусу. Даярдаган мугалими – Мамат Ишматов;

Күмүш медаль алгандар:

Ян Бобрус (24 упай) , “Газпром Кыргызстан” мектебинин окуучусу, Даярдаган мугалими – Мамат Ишматов;

Элдар Искендеров (23 упай) , Эл аралык UWIS мектебинин окуучусу. Даярдаган мугалими – Мамат Ишматов;

Искен Кенжебаев (22 упай), Жайыл баатыр атындагы жалпы билим берүү лицейинин окуучусу.

Ардак грамота ээлери:

Нурсултан Эшперов (13 упай) , “Газпром кыргызстан” мектебинин окуучусу. Даярдаган мугалими – Мамат Ишматов;

Султан Мусаходжаев (11 упай) , №70 мектеп-гимназия окуу-тарбия комплексинин окуучусу. Даярдаган мугалими – Мамат Ишматов.

Белгилей кетсек, Кыргызстандын курама командасынын олимпиадага барып келүү чыгымы толугу менен мамлекеттик бюджеттен каржыланды.

Эл аралык математикалык олимпиада 11-12-июль күндөрү Улуу Британияда өтүп, 600дөн ашуун окуучу катышты.

Олимпиаданын жыйынтыгы боюнча мамлекеттердин рейтингинде алдыңкы үчтүккө АКШ, Кытай, Түштүк Корея өлкөлөрү кирсе, Финляндия 36-орун, Казахстан 43-орун, Малайзия 44-орун, Эстония 47-орун, Швейцария 50-орун, Индия 51-орун, Өзбекстан 61-орун, Сауд Арабия 63-орунду ээледи.