Кыргыз Республикасынын Министрлер Кабинетинин Төрагасынын орун басары Эдил Байсалов жаңы Көптөгөн көрсөткүчтөр боюнча кластердик изилдөөнүн (КККИ) жыйынтыктары сунушталган тегерек столго катышты.

Иликтөөнүн алкагында Улуттук статистикалык комитет Кыргызстан боюнча 7,2 миң кожолукту саламаттыкты сактоо, билим берүү жана аялдарды жана балдарды социалдык жактан коргоого байланыштуу 185 көрсөткүч боюнча сурамжылоо жүргүзгөн.

Изилдөө Улуттук статистика комитети тарабынан ЮНИСЕФтин, БУУнун Калк фондусунун (ЮНФПА), АКШнын Эл аралык өнүктүрүү агенттигинин (USAID) жана Швейцария өкмөтүнүн техникалык жана каржылык колдоосу менен жүргүзүлгөн.

«Биз калктын кирешелеринин, керектөөнүн жана топтоолордун өсүшүнөн чагылдырылган калктын жашоо деңгээлинин реалдуу өсүшүн көрүп жатабыз. Бул балдардын жашоосун жакшыртууга алып келээрин көрүп кубанып жатабыз, бул өкмөттүн адамдык капиталга инвестициялоо, келечекке инвестициялоо, дени сак жана билимдүү калкка инвестициялоо боюнча эң башкы приоритети болуп саналат. Бул Кыргызстандын улуттук өнүгүүсүнүн эң негизги максаты», — деди Эдил Байсалов.

Өз сөзүнүн жүрүшүндө Министрлер Кабинетинин Жетекчисинин орун басары бизнестин финансылык жүгүн жеңилдетүү жана аларды экономиканын байкалбаган секторунан чыгаруу максатында Кыргыз Республикасынын Президенти «Кыргыз Республикасынын салык салуу жана социалдык камсыздандыруу чөйрөсүндөгү Айрым мыйзам актыларга өзгөртүүлөрдү киргизүү жөнүндө» Кыргыз Республикасынын Мыйзамына кол койгонун белгиледи.  

Кабыл алынган Мыйзам биринчи кезекте ак ниет иш берүүчүлөр үчүн камсыздандыруу төгүмдөрүн төлөө жүгүн кыскартууга багытталган. Иш берүүчү мурда 17,25% камсыздандыруу төгүмдөрүн өз каражатынан төлөсө, эми 2,25% төлөйт.

«Мен жеке сектордун көпчүлүк бөлүгү үчүн Социалдык фондго төлөмдөр 15%га кыскарганын эске салгым келет жана бул кичи жана орто бизнестеги ак ниет иш берүүчүлөргө жакынкы келечекте кызматкерлер үчүн эмгек акыны 10%дан кем эмес жогорулатууга мүмкүндүк берет деп күтөбүз» - деди Эдил Байсалов.