Ат-Башы районунун тургунунан 8 килограммдан ашык баңгизат алынганын бүгүн Нарын облустук ички иштер башкармалыгынан билдиришти.
Маалыматка караганда, ушул жылдын 12-октябрына караган түнү Ат-Башы райондук ички иштер бөлүмүнүн жана Жол кыймылынын коопсуздугун камсыздоо бөлүмүнүн кызматкерлери тарабынан Бишкек-Нарын-Торугарт автожолунан VOLVO-FH үлгүсүндөгү оор жүк ташуучу унаасын токтотуп текшерген учурда боз түстөгү каптан өзгөчө жыты бар өсүмдүк тектүү зат табылган.
Соттук-химиялык экспертизанын корутундусуна ылайык, аталган зат марихуана баңгизаты экени аныкталып, жалпы салмагы 8 килограмм 580 грамм болгон.
Текшерүүнүн жыйынтыгында аталган баңгизатын Ат-Башы районунун тургуну Жети-Өгүз районунда жайгашкан талаалардын биринен өзү колдонуу максатында жүк ташуучу автоунаа менен Ат-Башы районуна алып келе жатканы аныкталган.
Google Play
App Store