Эмгек, социалдык камсыздоо жана миграция министрлиги Кыргызстандын жарандарына Россия Федерациясынын миграция мыйзамдарындагы маанилүү өзгөрүүлөр тууралуу эскертет.

Министрликтин маалыматы боюнча, учурда Россия Федерациясынын аймагында миграциялык мыйзамдарды бузган 71 949 кыргызстандык жаран бар. Бул бузууларга эмгек же жарандык-укуктук келишим түзүү, дактилоскопиялык каттоодон, медициналык текшерүүдөн өтүү же миграциялык каттоого туруу жөнүндө маалыматтын жоктугу кирет. Жарандар өздөрүн порталдагы тизмеден текшере алышат https://migrant.kg: Алдын ала тизме.

Министрлик 2025-жылдын 1-январынан тартып, бир календардык жыл ичинде чет өлкөлүк жарандардын РВП, убактылуу жашап турууга уруксат же эмгек/жарандык-укуктук келишимсиз болушун 90 күнгө чейин чектөө жөнүндөгү Россия Федерациясынын Федералдык Мыйзамы күчүнө кирерин эскертет. Бул мыйзам буга чейин үч ай сайын мезгил-мезгили менен чыгып туруу жана кирүү тажрыйбасын колдонгон жарандарга таасирин тийгизет.

2025-жылдын 5-февралынан тартып Россия Федерациясынын аймагында мыйзамсыз жүргөн жарандар үчүн “чыгаруу режими” иштей баштайт. Тартип бузуучулар контролдонуучу адамдардын реестрине киргизилет жана чектөө чараларына дуушар болушат.

Россия Федерациясынын мыйзамдарынын белгиленген милдеттерин аткарбоо депортацияга жана адистештирилген мекемелерге жайгаштырууга алып келет. Эмгек, социалдык камсыздоо жана миграция министрлиги кыргызстандыктарды терс кесепеттерден сактануу үчүн белгиленген талаптарды сактоого чакырат.