УКМК тарабынан коррупциялык көрүнүштөрдү жоюу боюнча жүргүзүлүп жаткан иштердин жүрүшүндө Бишкек шаардык сотунун жазык коллегиясынын судьясы А.А.Б. жана судьянын аялы М.Г.М. аттуу жаран тарабынан алдамчылык фактысы аныкталды.

Тактап айтканда, судьянын аялы башка бир жарандан 2000 АКШ доллары (174 000 сом) өлчөмүндө акча каражатын талап кылган, мындан улам аталган жаран "М Банк" тиркемеси аркылуу анын атына акча которгон. Ал  күйөөсү, Бишкек шаардык сотунун жазык коллегиясынын судьясы А.А.Б.дан Бишкек шаардык сотунун жарандык иштер боюнча коллегиясынын судьясы Ж.М.З. (А.Г. аттуу жарандын доо арызы боюнча баяндамачы болгон)  менен байланышууну суранып,  А.Г. аттуу жарандын пайдасына оң чечим чыгаруу өтүнүчү менен кайрылган.

2024-жылдын 16-декабрында судья А.А.Б. Бишкек шаардык сотунун жарандык иштер боюнча коллегиясынын судьясы Ж.М.З.нын иш бөлмөсүнө кирип, доогер жаран А.Г.га жардам берүүнү өтүнгөн. Судья-баяндамачы баш тартып, мыйзамдарга ылайык чечим кабыл алына турганын белгилеген. Ошол эле учурда судья-баяндамачы Ж.М.З. аталган жарандык ишти кароону токтоткон, бул доогер А.Г. аттуу жарандын пайдасына болгон эмес.

Жүргүзүлгөн тергөө-ыкчам иш-чаралардын жыйынтыгы боюнча, КР жараны М.Г.М. Кылмыш-жаза процессуалдык кодексинин 96-беренесине ылайык УКМКнын убактылуу кармоочу жайына киргизилди. Ал эми Бишкек шаардык сотунун судьясы А.А.Б.га карата чогултулган материалдар Судьялар кеңешине караштуу Тартип комиссиясына жөнөтүлүп, алар 2024-жылдын 18-декабрында кылмыш жоопкерчилигине тартууга макулдук берди.

Баяндалгандарды эске алуу менен 18-декабрда Биринчи май райондук соту тарабынан Бишкек шаардык сотунун судьясы А.А.Б. жана анын жубайы М.Г.М.нын баш коргоо чарасын тандоо боюнча чечим кабыл алынат.