УКМК Ош ШИИБи менен биргеликте адам уурдап, ири суммадагы акча каражатын талап кылган жарандарды кармады.

УКМКнын маалымат кызматынан бүгүн билдиришкенге караганда, быйыл 16-январда Ош шаарындагы Т. Шоноев көчөсүндө, Ак-Тилек кичи районундагы шаардык оорукананын жанында Daewoo Tico үлгүсүндөгү автоунаа менен белгисиз адамдар  К.Д.У. аттуу жаранды күч колдонуп автомашинага салып, белгисиз тарапка алып кетишкен.

Жүргүзүлгөн ыкчам-иликтөө иш-чараларынын натыйжасында К.Д.У аттуу жаранды уурдап кеткендер: 1990-жылы туулган К.у.Т., 1991-жылы туулган К.у.К. жана 1991-жылы туулган И.Н.И экендиги аныкталды. Алар уурдап кеткен адамды Ош облусунун Өзгөн районуна карай алып кетишип, 2 сутка бою кармашкан. Кармоо мезгилинде кылмышкерлер уурдалган жаранды мобилдик капчыкка 190 миң сом өлчөмүндөгү акча каражатын которууга мажбурлашкан.

Аталган факты боюнча Ош ШИИБи тарабынан Кылмыш-жаза кодексинин 146-беренеси менен кылмыш иши козголгон. Жүргүзүлгөн ыкчам-издөө иш-чараларынын жыйынтыгында кылмышкерлер аныкталып, кармалган жарандар Ош шаардык милициясынын убактылуу кармоочу жайына киргизилген. Учурда тергөө иштери жүрүп жатат.