Министрлер Кабинетинин төрагасы Адылбек Касымалиев билим берүү тармагын реформалоо жана билим берүүнүн сапатын жогорулатуу боюнча чараларды көрүү зарылдыгын билдирди. Бул тууралуу ал Президенттин аппаратынын "Ынтымак Ордодо" өткөн коллегиясында билим берүү тармагындагы актуалдуу маселелерди талкуулоонун жыйынтыгында билдирди.

Тактап айтканда, өзгөчө статусу бар ЖОЖдордун ишмердүүлүгү, 12 жылдык билим берүү маселелери, кадрлардын жетишсиздиги, жогорку окуу жайларды лицензиялоо жана аккредитациялоо жаатындагы маселелер боюнча баяндамалар угулду.

МинКаб башчысы президент Садыр Жапаров билим берүү тармагына чоң көңүл буруп жатканын белгиледи. 2022-жылдан бери алты жогорку окуу жайына өзгөчө статус берилди. Билим берүү жана илим министрлигинин мектептерге 12 жылдык билим берүүнү киргизүү саясаты колдоого алынууда.

Коллегиянын жүрүшүндө тиешелүү мамлекеттик органдарга бир катар тапшырмалар берилди.

Тактап айтканда, Билим берүү жана илим министрлигине учурдагы көйгөйлөрдү чечүү жана лицензиялоонун бирдиктүү мамлекеттик платформасын киргизүү үчүн жаңы жеке менчик жогорку окуу жайларды лицензиялоого убактылуу мораторий жарыялоо тапшырылды; аккредитациялоо боюнча чечимдерди карап чыгуу, аккредитациялоо жол-жоболорун өркүндөтүү, аккредитациялоочу агенттиктердин стандарттарын жана жол-жоболорун оптималдаштыруу, агенттиктерге каршы санкцияларды катаалдаштырууну кароо; Министрликтин бардык бөлүмдөрүндө санариптик контролдоо механизмдерин киргизүү, лицензиялык жана контролдоо боюнча милдеттерди аткарбаган кызматкерлерге тартиптик жаза чараларын колдонуу, министрликтин тиешелүү бөлүмдөрүндө кызматтык иликтөө жүргүзүү.

Саламаттыкты сактоо министрлигине ченемдик укуктук актыларды эл аралык стандарттарга ылайык келтирүү жана клиникалык мекемелердин сапатына көзөмөлдү күчөтүү тапшырылды.

Экономика жана коммерция министрлигине стандарттарды жогорулатуу аркылуу лицензиялоо процесстерин жөнөкөйлөтүү, ошондой эле мыйзамдарда коррупциялык тобокелдиктерди жок кылуучу механизмдерди иштеп чыгуу тапшырылды.