Эмгек, социалдык камсыздоо жана миграция министри Равшанбек Сабиров брифингде билдиргендей, жакыр жана аз камсыз болгон үй-бүлөлөргө жардам берүүгө багытталган “социалдык контракт” программасы Президент Садыр Нургожоевич Жапаровдун демилгеси менен 2022-жылдан бери ишке ашырылууда.

Анын айтымында, үч жыл ичинде бул долбоордун алкагында 3,3 млрд республикалык бюджеттен 32 226 үй-бүлөгө бөлүнгөн.

Ошондой эле кошумча 3 000 үй-бүлө Дүйнөлүк банк тарабынан камтылган. Жалпысынан үч жылдын ичинде социалдык контракт 35 226 үй – бүлө менен түзүлгөн.

Министр социалдык контрактты алган үй-бүлөлөрдүн санын жыл боюнча;

• 2022 – жылы 2 800 үй-бүлөгө бөлүнгөн.
• 2023- жылы 10 000 үй-бүлөгө.
• 2024- жылы 19 426 үй-бүлө үчүн.

“Бул убакыттын ичинде программанын алкагында 35 226 үй-бүлө үчүн бизнес — программалар ишке ашырылды, алардын 73,3% айыл чарбасында, 13,8% өндүрүштө, 6,7% соодада жана 6,2% кызмат көрсөтүү чөйрөсүндө иштешет. Мониторингдин жыйынтыгы боюнча Программанын катышуучуларынын 94,2% айыл жеринде жашаган аялдар түзгөндүгү аныкталды. Кошумча 43 000 жумуш оруну түзүлүп, республика боюнча 190 миңден ашуун адамдын жашоо шарты жакшырды”, – деп белгиледи Равшанбек Сабиров.

Ошол эле учурда мониторингдин жыйынтыгы боюнча 35 226 үй-бүлөнүн ичинен 138 үй-бүлө социалдык контрактты ар кандай себептер менен аткара албай калган, анын ичинде форс-мажордук жагдайлардан улам мүлкүн жоготуу же ден соолугуна байланыштуу программага катышуудан өз ыктыяры менен баш тартуу себептери болду.

“2025 – жылы 13 334 жакыр жана аз камсыз болгон үй-бүлөлөр социалдык контракттын алкагында 150 000 сомдон ала алышат”, – деди министр.