Өлкөдө эпизоотиялык абал туруктуу. Азыркы тапта республикада малдын 9 ылаңына каршы эмдөө активдүү жүрүүдө. Буга өткөн жылы бюджеттен алгач 122 млн сом, андан кийин кошумча 182 млн. сом каралды. Эмдөө февраль айында башталып, мал жайлоого чыкканга чейин толук бүткөрүлүшү керек.

Суу ресурстары, айыл чарба жана кайра иштетүү өнөр жайы министрлигинин Ветеринардык кызматынын директорунун орун басары Бакыт Шараповдун Биринчи радионун түз эфиринде билдиришинче, быйылкы жылга карата иш-чаралар планы төмөндөн жогору карай малдын чыныгы башына, эпизоотиялык абалды эске алуу менен план түзүлүп, жергиликтүү өз алдынча башкаруу органдары менен макулдашылып бекитилди.

Анын негизинде Ветеринардык кызмат тарабынан райондук жана шаардык башкармалыктарга эмдөө иштерин өз убагында аткаруу максатында биокаражаттар бөлүштүрүлүп, жеткирилип берилген.

Улуттук статистика  комитеттин маалыматына ылайык, бүгүнкү күндө өлкөдө ири мүйүздүү малдын саны 1 828 000, кой-эчкинин саны 6 682 000 жана 553 000дөй жылкы баласы жана 7,7 млн. үй канаттуулары катталган.