2024-жылы мамлекеттик токой фондусунун жерине 1510 гектар аянтка экме токой отургузулган. Андан тышкары калктуу конуштардын аймактарын жашылдандыруу үчүн 641 миң көчөт берилген.

Бул тууралуу Токой кызматынын Токой экосистемаларын өнүктүрүү жана стратегиялык мерчемдөө башкармалыгынын башчысы Майрамбек Алиев Биринчи радионун түз эфиринде билдирди.

 Анын айтымында 2025-жылга 2120 гектар аянтка экме токой отургузуу пландаштырылган. Жалпы 3 миллионго жакын көчөт отургузулат. Учурда Ош, Баткен, Жалал-Абад облустарында көчөттөрдү отургузуу иши башталып, 800 гектардан ашык жерге экме токойлордун үрөнү себилген.

 Мындан сырткары Бишкек-Балыкчы, Бишкек-Торугарт унаа жолдорунун боюна да көчөттөр тигилүүдө. Ошондой эле учурда кийинки жылга көчөттөрдү даярдоо да колго алынган. Токой кызматынын иш планына ылайык, 2025-жылы кийинки жыл үчүн 16 миллиондон ашык көчөт даярдалат.