Тыбыт өндүргөн "Тегирмен-Башы" эчки чарбасы Баткен шаарынын Кызыл-Жол айылында жайгашкан.Учурда тыбыт өндүрүрүп, асыл тукум эчкилерди көбөйтүүнүн аракетинде. Азыркы тапта чарбада 1700дөн ашуун кыргыз тыбыт породасындагы эчки багылууда.

"Тегирмен-Башы" асыл тукум эчки өстүрүү заводунун директору Меңдибай Зикиряевдин айтымында, бир короодо 350, кээ бир короолордо 400 эчки бар.

“Учурда бир короо эчкинин тыбытын тарап бүттүк. Азыр эки жерде таралып жатат. 10 күндө бүтөбүз. Тыбыт сатылып, түшкөн каражат чарбанын кызматкерлерине айлык акы катары жумшалат. Аны менен катар эчки чарбаны өнүктүрүүгө иштетебиз” – деди ал.

Кызыл-Жол айылынын тургуну Акылбек Камчыев көп жылдан бери эчкинин тыбытын тарап иштеп келет. Ал күнүнө 5-7 кгдан тыбыт тарайт. Киллограмына 500 сом акча алат. Сезон 1 айга чейин созулат. Бул аралыкта 100 килограммга чейин тыбыт тароого жетишет.

Эчки багуу кирешелүү тармак. Алсак, 1 килограмм тыбыт 3000 сомдон жогору бааланып, ар бир эчкиден 300–400 граммга чейин тыбыт алууга болот. Чарба өткөн жылы 528,6 кг тыбыт өндүрүп 1,5 млн сомдон ашык киреше тапкан, 300гө жакын төл алынган. Мындан тышкары, ишкана тоют камдоо максатында 37 гектар сугат жерди иштетип келет.