УКМК мамлекеттик мүлктү мамлекеттен ажыратуу жана менчиктештирүү процессинин натыйжасында коррупциялык иштерди аныктоо жана бөгөт коюу боюнча жүргүзүлүп жаткан иш-чаралардын жүрүшүндө Саламаттык сактоо министрлигине караштуу Улуттук онкология жана гематология борборуна тиешелүү болгон жер тилкесин мыйзамсыз ээлеп алуу фактысын аныктады.

Аталган факты боюнча тергөөгө чейинки текшерүүнүн алкагында жүргүзүлгөн текшерүү иш-чараларынын натыйжасында Улуттук  онкология жана гематология борборунун директорунун мурдагы орун басары административдик ыйгарым укуктарынан кыянаттык менен пайдаланып, жеке кызыкчылыгын көздөп, Улуттук  онкология жана гематология борборунун түштүк-батыш тарабында жайгашкан 0,46 га аянтты ээлеген жер тилкесин менчиктеп алганы такталды.

Ал өз атынан Улуттук онкология жана гематология борбору менен 60 унаа токтотуучу убактылуу гараж уюштуруу максатында, белгиленген жер тилкесин ижарага берүү боюнча келишим түзүү демилгесин көтөргөн.

Андан соң, жер тилкесине эч кандай укук белгилөөчү документтери жана имараттарды курууга уруксат кагазы жок туруп, мыйзамсыз түрдө бир нече турак жайларды куруу иштерин жүргүзгөн. Алардын биринде өзү 28 жылдан бери жашап, мыйзамсыз басып алуу фактысын жашыруу максатында кыймылсыз мүлккө кандайдыр бир каттоо документтерин тариздеген эмес.

Текшерүүнүн жыйынтыгы көрсөткөндөй, бул жер тилкеси Бишкек шаарынын мэриясынын же Улуттук онкология жана гематология борборунун муниципалдык менчигинин балансында жок жана кадастр органдары тарабынан 28 жылдан бери бул жер участогуна идентификациялык код ыйгарылган эмес.

Мындан тышкары, бул жерге өзүнчө операциялык блок жана бильярд кана курулган. Оор жүктү жана оорулуу жарандар үчүн орундардын жетишсиздигин эске алуу менен, аталган жер тилкесин бейтаптар үчүн палаталары бар кошумча блокторду куруу үчүн пайдаланууга болот.

Мурдагы орун басар менен Улуттук  онкология жана гематология борборунун ортосунда түзүлгөн келишим жокко чыгарылып, 0,46 га өлчөмүндө жер тилкесине идентификациялык код ыйгаруу менен, андан ары мамлекеттин балансына өткөрүп берүү боюнча иштер жүргүзүлдү.