Эми иш берүүчү айлыкты кечиктирсе ар бир мөөнөтү өтүп кеткен календардык күн үчүн кошумча туум төлөйт. Бул тууралуу Эмгек, социалдык камсыздоо жана миграция министрлиги билдирет.

Ведомстводон билдиришкендей, туумдун бирдиктүү пайызы белгиленген. Эми, эгерде иш берүүчү эмгек акыны, өргүү боюнча жөлөкпулдарды, бошотуу жөлөкпулдарын же башка төлөмдөрдү кечиктирсе, анда ал ар бир мөөнөтү өтүп кеткен календардык күн үчүн иш жүзүндө төлөнбөгөн сумманын 0,25 пайызын кошумча төлөөгө милдеттүү.

Доонун эскирүү мөөнөтү да аныкталган. Эгерде иш берүүчү айлык маянасын өз убагында төлөбөсө, кызматкер 3 жыл ичинде сотко кайрылып, акча талап кылууга укуктуу. Эсептөө эмгек акы төлөнө турган күндөн башталат.