Баткен шаарынын Токтогул-Олуя конушунун тургундары таза суу менен камсыз болду. Буга чейин аймактагы жашоочулар сууну алыстан ташып ичүүгө аргасыз болсо, эми ар бир үйгө 24 сааттык таза суу жеткирилүүдө.

Баткен шаардык «Таза-Суу» муниципалдык ишканасынын маалыматына ылайык, бул аймакка таза суу түтүктөрүн тартууга 2023-жылы жергиликтүү бийлик тарабынан 2 млн. сом бөлүнгөн. 2024-жылы кошумча каржылоонун негизинде суу түтүктөрү ар бир үйгө киргизиле баштады. Учурда шаарда 7600дөн ашык суу колдонуучу бар. Анын ичинен 2000 кожолук суткасына 24 саат суу менен камсыз болсо, 3100 кожолукка суу сааты менен берилет.

Баткен шаарынын мэри Темирболот Абыкеевдин айтымында, таза суу көйгөйүн толук чечүү үчүн шаардын башкы планы иштелип чыгып, долбоорлор даярдалууда. Алдыңкы 1,5–2 жыл ичинде шаарды 100% таза суу менен камсыздоо пландалууда.

Эскерте кетсек, 2019-жылы Баткен шаарында таза суу маселесин чечүү үчүн 5 млн евролук долбоор ишке ашырылган. Бирок подрядчы компания курулуш иштерин толук аяктабай калган. Учурда калган иштерди бүтүрүү үчүн тиешелүү сүйлөшүүлөр жүрүүдө.