УКМК тарабынан Билим берүү тармагындагы коррупциялык көрүнүштөрдү аныктоо боюнча жүргүзүлүп жаткан иш-чаралардын натыйжасында 2020-2024-жылдар аралыгында Баткен мамлекеттик университетинде (мындан ары - БатМУ) бюджеттик каражаттарды мыйзамсыз пайдалануу фактылары аныкталды.

Тактап айтканда, Кылмыш-жаза кодексинин 210-беренесинин 4-бөлүгүнүн 1-пункту “Ишенип берилген мүлктү өзгөчө ири өлчөмдө ыйгарып алуу жана коротуу" боюнча козголгон кылмыш ишинин алкагында БатМУнун жооптуу кызматкерлери контракттык негизде окуу үчүн акы төлөнүүчү студенттердин акча каражаттарын ыйгаруу боюнча мыйзамсыз схеманы, ошондой эле жалган документтерди тариздөө жолу менен командировкалык чыгымдарды негизсиз төлөөлөрдү уюштургандыгы такталган.

Алсак, 2020-жылдан 2024-жылга чейин контракт боюнча окуу үчүн студенттер төлөгөн 14 млн. 447 миң 200 сом акча каражаты БатМУнун бюджетине түшпөй, университеттин жооптуу адамдары тарабынан кымырылган.

Мындан тышкары, университеттин жооптуу адамдары тарабынан кызматкерлерге жана студенттерге 2 млн.875 миң 300 сом суммасында негизсиз чет өлкөгө командировкалык төлөмдөр системалуу түрдө жүзөгө ашырылган.

Финансы министрлигине караштуу ички аудит кызматын тартуу менен жүргүзүлгөн аудитордук текшерүүнүн жыйынтыгы боюнча келтирилген зыян 17 млн.322 миң 500 сомду түзгөн.

Азыркы учурда кызмат адамдарын аныктоо жана жоопкерчиликке тартуу жана алар тарабынан аныкталган зыяндын ордун толтуруу боюнча тиешелүү тергөө-ыкчам иш-чаралар жүргүзүлүүдө.