Назгүл Нааматовага автоунаасын оңдотуу үчүн кайрылган кардарлардын аягы узулбайт. Анткени мезгил өткөн сайын автоунаалардын саны көбөйүп, техникалык мүчүлүштүктөргө учурагандардын саны дагы аз эмес. 

"Өзүм үчүн өзүмдүн жумушум абдан кызыктуу. Кызыгып иштесе, бардык жумуш жакшы. Ар бир автоунаа ар башка, ар бир деталы 5 миң сомдон", — дейт ал.

Назгүл автоунааларды оңдоп, колдонууга чыгаруу үчүн сырдап, түстөрүн жакшыртат. Ал мындай жумушту жолдошуна кол кабыш кылып үйрөнүп, акыркы 3 жылдан бери өз алдынча иштеп келет. Ага чейин эки баласына айына 1 600 сом жөлөк пул алып келген айым, социалдык контракттын алкагында 100 миң сом каражатка ээ болуп, автоунааларды оңдоого керектүү жабдууларды алган.

"100 миң сом алып, өзүмө керектүү жабдууларды жана тетиктерди жаңыртып алдым. Соцкелишим боюнча аракет кылып иштесе болот", — дейт Назгүл.

Калктын аялуу катмарына жардам көрсөтүп, шартын жакшыртууга багытталган долбоордун алкагында акыркы сегиз жыл ичинде жалпы 44 427 адам кайтарымсыз каражатка ээ болуп, ар кыл багытта иш алып барышкан.

Эмгек, социалдык камсыздоо жана миграция министрлигинин жетекчи адиси Жалын Токтосуновдун айтымында, быйыл 2025-жылы ушул программа аркылуу 12 222 үй-бүлө соцжардам алды. Учурда соцкелишим менен ийгиликтүү иш алып барып, жылдык кирешеси миллиондорго жеткен катышуучулар да бар. Алардын саны бүгүнкү күндө 9 үй-бүлөгө жетти.

Долбоорго тартылгандардын басымдуу бөлүгү айыл чарба, өндүрүш, соода-сатык жана кызмат көрсөтүү тармактарында иш алып барышат. Алардын арасынан ийгиликтүү иш жүргүзгөн миңден ашык адамга эки жүз миң сомдон пайызсыз насыялар берилген.