Сузак району боюнча прокуратура жашы жете элек өспүрүмдөргө карата жасалган сексуалдык мүнөздөгү зомбулук фактыларына байланышкан иштерди күчөтүлгөн көзөмөлдө кармоону улантууда. Бул тууралуу мекемеден кабарлашты.

Прокуратуранын маалыматына караганда, мындай кылмыштар баланын психологиялык жана физикалык ден соолугуна олуттуу зыян алып келерин эске алуу менен, тергөө органдарында жүргөн иштердин так жана мыйзамдуу аткарылышы өзгөчө көзөмөлдөнүүдө. Тергөөдө жапа чеккен балдардын укуктары корголуп, күнөөлүүлөрдү жоопкерчиликке тартуу процесси ачык-айкын жүргүзүлүшү талап кылынууда.

Тергөөдө үй-бүлөдөгү социалдык көйгөйлөр, ата-энелик көзөмөлдүн аздыгы, интернет коопсуздугун билбөө жана укуктук маалыматтын жетишсиздиги зомбулукка шарт түзгөн негизги факторлор катары белгиленген.

Прокуратура ата-энелерге балдары менен ачык сүйлөшүүнү, интернет колдонууда көзөмөлдү күчөтүүнү жана коопсуз жүрүм-турум жөнүндө түшүндүрүп турууну сунуштайт. Ал эми билим берүү мекемелерине шектүү көрүнүштөрдү дароо билдирүү зарылдыгы эскертилди.

Мындан тышкары, мектептерде профилактикалык иштер уланууда. Зомбулуктун себебин азайтуу боюнча тиешелүү мамлекеттик органдарга сунуштар берилген.

2025-жылдын 9 айынын жыйынтыгына ылайык, Сузак РИИБ тарабынан жашы жете элек жарандарга карата сексуалдык мүнөздөгү зомбулук боюнча 10 кылмыш иши тергелип, сотко жөнөтүлгөн. Алардын 8и — КР Кылмыш-жаза кодексинин 154-беренеси, 2си — 157-берене боюнча козголгон. Соттун чечими менен 2 адамга өмүр бою эркинен ажыратуу жазасы берилген.

Прокуратура ар бир баланын укугун коргоону негизги милдет катары карманып, бул багыттагы иштер мындан ары да тынымсыз улантыларын белгиледи.